Guce, Gameir Winner palaban sa Hopeful Stakes Race

MANILA, Philippines — Paniguradong mapapalaban si class A rider John Alvin Guce at sasakyan nitong Gameir Winner sa 2024 PHILRACOM “Hopeful Stakes race” na ilalarga sa Metro Turf, Malvar - Tanauan City, Batangas sa Hulyo 21. 

Ito’y dahil mga tigasin din ang pito pang nagsaad ng pagsali.

Si Guce ang reigning Philippine Sportswriters Association, (PSA) - Jockey of the Year awarde na magtitimon sa Gameir Winner sa event na suportado ng Philippine Racing Commission, (PHILRACOM).

Nakalaan ang P1M guaranteed prize na ikakalat sa unang anim na kabayong tatawid sa meta sa distansyang 2,000 meter race.

Kukubrahin ng mananalong kabayo ang P600,000.

Ang iba pang makikipagtagisan ng bilis ay ang Beltuna, Boss Lady, Boss Uno, King James, Malibu Princess, Summer Rule at Wolfthreefivenine.

Inaasahang magbibigay ng magandang laban sa Gameir Winner ang Malibu Princess at Boss Lady na gagabayan nina jockey Pabs Cabalejo at MM Gonzales.

Samantala, pasisibatin din sa nasabing petsa ang 3rd Leg Triple Crown Stakes race kaya tiyak na dadagsain ng mga karerista ang karerahan upang saksihan ang mahuhusay na kabayo.

Show comments