Italian coach gagabay sa Alas Men
MANILA, Philippines — Matapos si Brazilian coach Sergio Veloso ay si Italian tactician Angiolino Frigoni ang siya namang hahawak sa Alas Pilipinas Men.
Iginiya ng 70-anyos na si Frigoni ang Italian U21 men’s national team sa World Championship title noong 2021 at inaasahan ng Philippine National Volleyball Federation (PNVF) na matutulungan ng foreign coach ang mga Pinoy spikers.
“He’s a two-time Olympic coach. He’s here to share with us his expertise and to bring our team and elevate their skills next year,” wika ni PNVF president Ramon ‘Tats’ Suzara sa Italian coach.
Mananatili naman si Veloso sa PNVF bilang bagong junior development director.
Sa paggiya ni Veloso ay pumuwesto ang Alas Pilipinas Men sa 10th place finish sa nakaraang 2024 AVC Challenge Cup for Men.
Pamumunuan ni Frigoni ang paghahanda ng national team para sa FIVB Volleyball Men’s World Championship 2025 na pamamahalaan ng bansa.
Kumakausap din ang PNVF ng ilang Japanese club teams para makalaban ng Alas Pilipinas Men sa isang friendly match bilang bahagi ng preparasyon para sa world meet.
- Latest
