Lady Chiefs kinumpleto ang semis cast
MANILA, Philippines — Kinumpleto ng Arellano University ang Final Four cast matapos nilang ratratin sa tatlong sets ang Jose Rizal University, 25-16, 25-16, 25-16 sa NCAA Season 99 women’s volleyball tournament na nilaro sa FilOil EcoOil Centre kahapon.
Makakasama ng Arellano U na papalo ng bola sa semifinals ang defending champions College of Saint Benilde Lady Blazers, Lyceum of the Philippines Lady Pirates at Letran Lady Knights.
Tinapos ng Lady Chiefs ang elimination round na may 6-3 karta kapareho ang Mapua University Cardinals pero nasikwat ng una ang No. 4 spot dahil sa mas mataas na tie break points.
Nalasap naman ng Kalentong-based squad ang pang walong talo sa siyam na laro.
Tumulong sa opensa para sa Arellano U si Pauline De Guzman na nagtala ng 13 points habang bumakas sina team captain Dodee Batindaan at Fhaye Mangubat ng tig-12 puntos para itaguyod ang Lady Chiefs sa panalo.
Sa unang laro nagwagi ang Lady Cardinals laban sa San Beda University, 25-21, 26-24, 22-25, 25-13, matapos silang akbayan nina Raissa Ricablanca at Nicole Ong.
Nawalan ng saysay ang mga tinikada nina Ricablanca at Ong dahil laglag sila sa Magic 4, pero kung nagwagi ang Arellano via four sets ay sila naman ang sasampa sa F4.
Stepladder ang labanan sa semis dahil winalis ng Lady Blazers ang nine-game elimination round at diretso na sila sa finals.
- Latest
