Creamline nauna na sa Finals
MANILA, Philippines — Winalis ng Creamline ang Chery Tiggo, 25-16, 25-21, 25-20, papasok sa pang-pitong sunod na Premier Volleyball League All-Filipino Conference finals sa harap ng 17,834 fans kahapon sa Smart Araneta Coliseum.
“Siyempre, masaya kami at naka-finals kami ulit pero hindi pa tapos iyong trabaho,” ani coach Sherwin Meneses. “Ang target naman is ma-defend iyong crown, so magpe-prepare muna ulit kami kung sinuman ang makalaban namin sa finals.”
Sa kabuuan ay sasalang ang Cool Smashers sa PVL record na ika-11 sunod na finals appearance at puntirya ang pang-walong titulo.
Nagbagsak si Tots Carlos ng 16 points mula sa 11 attacks, tatlong blocks at dalawang service ace at may 10 markers si Alyssa Valdez para sa kanilang 2-1 baraha sa semis.
May pitong puntos si Pangs Panaga habang may tig-anim at limang marka sina Jema Galanza, Kyle Negrito at Risa Sato, ayon sa pagkakasunod.
Pumalo sina Eya Laure at Aby Maraño ng tig-walong puntos para sa Crossovers na bagsak sa bronze medal match bunga ng kanilang 0-3 kartada sa semis.
Ang Chery ang isa sa dalawang koponang nagposte ng seven-game winning streak sa elimination round bukod sa Petro Gazz.
Ngunit yumukod sila sa Petro Gazz, 25-20, 21-25, 15-25, 16-25, sa pagbubukas ng semis noong Abril 30 na nagpasimula ng kanilang tatlong dikit na kamalasan.
- Latest