Magnolia sa quarters
MANILA, Philippines — Nangusan ng Magnolia sa end game ang Terrafirma, 108-100, upang makasiguro ng tiket sa 2024 PBA Philippine Cup quarterfinals kahapon sa Philsports Arena sa Pasig.
Maagang umalawag sa 15 puntos na kalamangan ang Hotshots bago pigilan ang ragasa ng Dyip sa dulo tungo sa 6-4 kartada para sundan sa playoffs ang mga kapatid na San Miguel (10-0) at Barangay Ginebra (7-3).
Wala ng pag-asa sa Top 2 ang Magnolia dahil sa kabiguan kontra sa Ginebra at sa NLEX (5-4) na nasa unahan nito pero nakasikwat ng krusyal na tagumpay upang makaiwas sa ‘twice-to-win’ disadvantage kung sakali.
Naputol din ng Hotshots ang two-game losing skid nito papasok sa huling duwelo kontra sa TNT.
Nagsanib-puwersa sina Ian Sangalang at Mark Barroca sa pag-iskor ng 23 at 21 points, ayon sa pagkakasunod.
Tampok dito ang krusyal na lay-up ni Sangalang para sa 101-98 kalamangan sa huling dalawang minuto bago pumukol ng limang sunod na puntos si Barroca para selyohan ang tagumpay.
Nag-ambag din ng 17 points, 5 rebounds at 7 assists si Paul Lee, habang walang kupas ang kapitang si Rafi Reavis, edad 46-anyos, sa paghakot ng 10 points at 13 rebounds.
Nahabol ang unang bentahe ng Hotshots subalit naibalik ito sa 68-53 abante sa third quarter bago rumatsada ang Dyip at makalapit sa 98-99 matapos ang tres ni rookie Stephen Holt sa dalawang minuto.
Kumamada ng career-high na 32 points si Holt sahog pa ang 4 rebounds at 8 assists para sa Terrafirma.
- Latest