Lyceum makikisalo sa liderato
MANILA, Philippines — Sisikapin ni Johna Denise Dolorito at ng Lyceum of the Philippines Lady Pirates na manatiling malinis ang kanilang karta upang sumalo sa tuktok ng team standings sa NCAA Season 99 women’s volleyball tournament.
Hawak ang 6-0 card, kakalabanin ng Intramuros-based squad ang kalugar nilang Letran Lady Knights ngayong araw sa Filoil EcoOil Centre.
Magsisimula ang kanilang bakbakan sa alas-10 ng umaga sunod ang banatan sa pagitan ng San Sebastian College Lady Stags at Emilio Aguinaldo College Lady Generals sa alas-2 ng hapon.
Bukod sa pangunahing sandata ng Lady Pirates, huhugutan nila ng lakas sina Hiromi Osada, Joan Doguna, Janeth Tulang at Vanessa Yvonne Martin para makuha ang inaasam na panalo at samahan sa unahan ang defending champions College of Saint Benilde Lady Blazers na hawak ang 7-0 record.
Humanga ang mga fans sa ipinakitang laro ng LPU nang patahimikin nila sa tatlong sets ang Jose Rizal University Lady Bombers, 25-21, 25-9, 25-22, halos walang kahirap-hirap nila itong ginapi.
Nagtala noon si Dolorito ng game-high 16 points kasama ang 14 attacks at dalawang service aces habang 14 ang kinana ni Osada.
- Latest