Dyip nagpalakas para sa playoffs

MANILA, Philippines — Umeskapo ang Terrafirma kontra sa NorthPort, 110-108, upang mapalakas ang pag-asa nito sa playoffs ng 2024 PBA Philippine Cup kahapon sa Ninoy Aquino Stzadium.

Ibinuslo ni super rookie Stephen Holt ang game-winning lay-up sa huling tatlong segundo bago napigilan ng Dyip si Arvin Tolentino sa final buzzer tungo sa dikit na tagumpay.

Mula sa tabla sa ika-7 hanggang ika-8 puwesto kasama ang Batang Pier, biglang angat ngayon sa No. 5 ang Terrafirma kasalo ng rumaragasang Rain or Shine hawak ang parehong 5-5 kartada.

Kumamada ng 22 puntos si Holt sahog pa ang 12 rebounds, 5 assists at 4 steals upang giyahan ang opensa ng Dyip tampok ang limang players sa double digits.

Sumuporta sa kanya sina Juami Tiongson, Mark Louie Sangalang, Javi Gomez de Liaño at Isaac Go na may 21, 19, 14 at 10 puntos, ayon sa pagkakasunod.

Mainit ang naging simula ng Terrafirma at kontrolado ang laro nang makapagtayo pa ng 75-63 abante sa second quarter para mamuro sa tagumpay matapos ang dalawang sunod na kabiguan.

Subalit muntikang masayang ng Dyip ang mala­king abante, kasama na ang 102-92 lead sa hu­ling 15 minuto matapos magpakawala ng 16-6 run ang Batang Pier na tinuldukan ng freethrows ni Arvin Tolentino para makatabla sa 108-108 sa huling 24 segundo.

Sa kabutihang palad, sumaklolo sa kanila si Holt.

Hindi kumasya ang 25 puntos ni Tolentino pati na ang 18, 17, 14 at 10 puntos nina Cade Flores, Will Navarro, Allyn Bulanadi at Paul Zamar para sa NorthPort na sumadsad sa 4-6 kartada.