SGA inilusot ang Thunder sa Pelicans
OKLAHOMA CITY — Humataw si Shai Gilgeous-Alexander ng 28 points, kasama ang three-point play sa huling 32.5 segundo, para sa 94-92 pagtakas ng top-seeded Thunder sa New Orleans Pelicans sa Game One ng kanilang first-round Western Conference playoff series.
Mintis ang tangkang three-point shot ni CJ McCollum sa pagtunog ng final buzzer sa posesyon ng New Orleans na sumelyo sa unang panalo ng Oklahoma City sa kanilang home playoff game sapul noong 2019.
Nagdagdag si Jalen Williams ng 19 points at humakot si Chet Holmgren ng 15 points, 11 rebounds at 5 blocks para sa Thunder.
Umiskor si Trey Murphy III ng 21 points habang may 20 markers si McCollum at kumolekta si Jonas Valanciunas ng 13 points at 20 rebounds sa panig ng Pelicans.
Hindi naglaro si New Orleans’ leading scorer Zion Williamson dahil sa strained left hamstring.
Sa Los Angeles, humataw si James Harden ng 28 points at kumolekta si Ivica Zubac ng playoff-career high 20 points at 15 rebounds sa 109-97 panalo ng Clippers sa Dallas Mavericks.
Sa Boston, itinala ni Jayson Tatum ang 23 points, 10 rebounds at 10 assists para sa una niyang career playoff triple-double sa 114-94 paggupo ng Eastern Conference top seeded Celtics sa Miami Heat sa kanilang first-round playoff series.
Sa Milwaukee, bumira si Damian Lillard ng 35 points sa first half sa 109-94 pagsuwag ng Giannis Antetokounmpo-less Bucks sa Indiana Pacers.
- Latest
