MANILA, Philippines — Magpapakitang-gilas ang siyam na Pinoy players na napili para lumaro sa Japan B.League All-Star Weekend na gaganapin sa Enero 13 hanggang 14 sa Okinawa Arena, Japan.
Nangunguna si Gilas Pilipinas standout Dwight Ramos ng Levanga Hokkaido base sa listahan na inilabas ng liga sa kanilang social media accounts.
Isa si Ramos sa Asia All-Stars.
Kasama rin sa Asia All-Stars team ang mga Pinoy imports na sina RJ Abarrientos ng Shinshu Brave Warriors, at sina Kiefer Ravena ng Shiga Lakestars at Thirdy Ravena ng San-En Neo Phoenix.
Pasok din sina Bobby Ray Parks Jr. ng Nagoya Diamond Dolphins at Matthew Wright ng Kyoto Hannaryz na kamakailan lamang ay nakapasok sa 1,000-point club sa liga.
Hahataw din sa All-Star sina Greg Slaughter ng Rizing Zephyr Fukuoka, Kai Sotto ng Yokohama B-Corsairs at Carl Tamayo ng Ryukyu Golden Kings.