MANILA, Philippines — Malaking isda ang nabingwit ng Blackwater matapos gulatin ang nagdedepensang TNT Tropang Giga, 85-78, sa PBA Philippine Cup kahapon sa Ynares Center sa Antipolo City.
Bumida si veteran guard JVee Casio sa kanyang iniskor na pitong puntos ng Bossing sa fourth period.
Tinapos ng 2011 No. 1 overall pick ng Powerade ang laro na may 22 points tampok ang limang three-point shots.
“Alam namin na we have a chance if we play together and play as a team,” ani coach Ariel Vanguardia.
Nagdagdag si Baser Amer ng 11 points at may tig-10 markers sina rookie Ato Ular, James Sena at Yousef Taha.
Nadiskaril ang hangad na ikalawang sunod na ratsada ng Tropang Giga para sa kanilang 1-1 baraha.
Mula sa 39-37 abante sa halftime ay kumamada ang Blackwater sa third period para itayo ang 13-point lead, 64-51.
Sa pangunguna ni RR Pogoy ay nakatabla ang TNT sa 78-78 sa huling dalawang minuto ng final canto.
Ang basket ni Casio ang nagbigay sa Bossing ng 80-78 bentahe sa nalalabing 1:22 minuto kasunod ang long jumper niya para sa kanilang four-point advantage sa huling 1:06 minuto.
Nagkaroon ng turnover si Jayjay Alejandro sa posesyon ng Tropang Giga.
Ang resulta nito ay ang tres ng 35-anyos na si Casio sa natitirang 41.4 segundo para sa kanilang panalo.