MANILA, Philippines — Ayaw paawat ni Fil-Am Jason Brickman sa pagpapasiklab sa Taiwan matapos trangkuhan ang Kaohsiung Aquas sa 102-77 panalo kontra sa Tainan TSG GhostHawks sa T1 League.
Kumamada si Brickman ng 16 puntos, walong assists, apat na rebounds at dalawang steals para sa ikalawang sunod na panalo ng Aquas upang mapatatag ang kapit sa liderato bitbit ang 18-6 kartada.
Nauna nang tinalo ng Kaohsiung ang Tainan, 103-93, noong nakaraang linggo sa likod ng season-best 19 assists ni Brickman sahog pa ang 16 markers at anim na rebounds.
Hangarin ni Brickman at ng Aquas na tuluyan nang makopo ang top seed kontra sa New Taipei CTBC DEA sa Linggo.
Nakakuha ng suporta si Brickman kay Mindaugas Kupsas na naglista ng 19 markers,12 boards, dalawang assists at dalawang blocks, habang may limang tres para sa 15 puntos si Yu Huan-ya.
Humakot ng 21 at 20 puntos sina Jordan Chatman at dating Ginebra import Charles Garcia, ayon sa pagkakasunod, para sa Tainan na sumadsad sa 4-19 kartada.