MANILA, Philippines — Mula sa volleyball, mukhang papasukin na rin ni The Phenom Alyssa Valdez ang pagboboksing.
Sa Instagram story na pinost ng Philippine national women’s volleyball team stalwart, ipinasilip niya ang kanyang mitts drill kasama ang boxing trainer at coach na si Pablo Gabunia.
Ipinakita niyang may potensiyal din siya sa boxing sa kanyang bilis at lakas sa pagsuntok.
Kung ‘di pa makakabalik ang volleyball, may iba nang sport na puwedeng puntahan si Valdez, three-time Premier Volleyball League (PVL) MVP.
Bukod sa mga volleyball drills at exercises na ginagawa ni Alyssa sa bahay, isinama na rin niya ang boxing para manatili sa kondisyon habang wala pang nangyayaring aksiyon sa volleyball.
Anim na buwan na mula nang matigil ang aksiyon sa volleyball at iba’t ibang paraan ang ginagawa ni Valdez para manatili sa kondisyon. Mayroon siyang mga volleyball drill na ginagawa sa kanilang garahe kasama ang boyfriend na PBA player na si Kiefer Ravena ng NLEX.