Dela Cruz, Santos nagbulsa ng medalya sa Asean Games

SEMARANG, Indonesia -- Ibinigay nina Than­ya Angelyn Dela Cruz at Phillip Joaquin San­tos ang dalawang me­­dalya sa Philippine Swim­ming Team maka­raang lumangoy ng pilak at tanso sa 11th Asean School Games na ginaga­nap sa Jatidiri Sports Com­plex dito.

Inangkin ni Dela Cruz ang unang medalya ng ko­ponan nang sumegun­da sa sinalihang girls’ 50-meter breaststroke sa bilis na 33.82 segundo.

Kapos lamang siya ng gahiblang .01 segundo kay gold medal winner Ade­lia Adelia ng Indonesia na may 33.81 segundong naitala.

Nagdagdag naman ng tansong medalya si Santos na nagsumite ng da­lawang minuto at 9.30 se­gundo sa boys’ 200m backstroke event sa likod nina  medal winner  Farrel Armandio Tang ng Indonesia na may 2:04.08 at Khiew Hoe Yean ng Malaysia na nagtala naman ng tiyempong 2:08.01.

Magtatangka namang humirit ng medalya si Philippine junior record holder Micaela Jasmine Mojdeh ng Brent International School-Laguna sa kanyang mga paboritong events gayundin sina Mer­vien Jules Mirandilla at John Neil Paderes.

Nagtapos naman sa ika-siyam na puwesto si Swimming Pinas tanker Jor­dan Ken Lobos sa boys’ 50m breaststroke (32.72) gayundin si Mi­guel Barreto sa boys’ 100m freestyle (55.42).

Ikasiyam din sina Ja­nelle Alisa France Lin sa girls’ 100m freestyle (1:04.14) at 400m freestyle (4:49.29), at Mary So­phia Manantan sa girls’ 50m breaststroke (36.49), habang nagtapos sa ika-10 si Eirron Seth Vibar sa boys’ 400m freestyle (4:17.79).