MANILA, Philippines — Binanderahan ni Swimming Pinas standout Micaela Jasmine Mojdeh ang delegasyon na bumiyahe kahapon patungong Semarang, Indonesia para sa 11th Asean School Games na pakakawalan ngayong araw.
Kasama ng Palarong Pambansa multi-gold medallist na si Mojdeh ang iba pang miyembro ng swimming team na magtatangkang humakot ng gintong medalya sa naturang annual meet.
Walong events ang lalanguyan ni Mojdeh.
Lalahok siya sa girls’ 50m butterfly, 200m butterfly, 100m butterfly, 200m Individual Medley at 400m Individual Medley, habang bahagi rin siya ng 4x100m medley relay, 4x100m freestyle relay at 4x200m freestyle relay team.
Bukod kay Mojdeh, nasa lineup din sina Swimming Pinas tankers Jordan Ken Lobos, John Neil Paredes at Jules Mervien Mirandilla na nakatakdang dumating sa Indonesia bukas kasama si head coach Virgie De Luna.
Sasabak si Lobos sa 50m breaststroke, 100m breaststroke, 200m breaststroke at 4x100m medley relay, samantalang sasabak si Paredes sa 50m butterfly at 50m backstroke, at aarangkada si Mirandilla sa 50m butterfly, 100m butterfly, 200m butterfly at 50m freestyle.