Pagulayan sinargo ang tiket sa Last 8 ng World Pool

MANILA, Philippines — Lumilipad pa rin ang bandila ng Pilipinas ma­tapos makahirit ng ti­ket sa quarterfinals si Fi­lipino-Canadian Alex Pa­gulayan sa prestihi­yo­song 2019 World Pool Masters na ginaganap sa Victoria Stadium sa Gibraltar.

Ginamitan na ng 2005 Southeast Asian Games triple gold me­da­list na si Pagulayan ng malalim na karana­san para ilusot ang dikdikang 7-6 panalo laban kay Ko Pin Yi ng Chinese-Taipei.

Target ni Pagulayan na maipagpatuloy ang ma­gandang ratsada sa Final 8 sa pakikipagtuos kay 2017 Aramith Masters champion Eklent Ka­ci ng Albania.

Pumasok si Kaci sa quarterfinals matapos gu­lantangin si Jayson Shaw ng Scotland mula sa 7-2 panalo.

Nakahirit din ng tiket sa quarterfinals sina David Alcaide ng Spain, Shane Van Boening ng Amerika, Alexander Ka­zakis ng Greece, Matt Edwards ng New Zea­land, Albin Ouschan ng Austria at Skyler Woodward ng Amerika.

Iginupo ni Alcaide si Niels Feijen ng Netherlands (7-3), pinatalsik ni Van Boening si Han Yu ng China (7-6), tinalo ni  Kazakis si Justin Sajich ng Australia (7-3), wagi si Edwards kay Konrad Juszczyszyn ng Poland (7-6), nanaig si Ouschan kay Joshua Filler ng Germany (7-6) at namayani si Woodward may Fedor Gorst ng Russia.

Maliban sa Pagula­yan-Kaci game, magta­tapat din sa quarterfinals si­na Alcaide at Van Boening gayundin sina Kazakis at Edwards at sina Ouschan at Woodward.

Gagamitin ang race-to-seven format hanggang quarterfinals at race-to-eight ang se­mi­fi­nals at race-to-nine ang fi­nals.