MANILA, Philippines — Inihayag ng LA Lakers na nakalista ng ‘day to day’ si LeBron James na na-strain ang kanyang left groin matapos lumabas ang kanyang MRI exam.
Inaasahang hindi mawawala ng matagal si James base sa kanyang post sa Twitter matapos lumabas ang balita.
Gumamit ang Los Angeles Lakers star ng emoji upang ipakita ang kanyang pasasalamat.
“Dodged a bullet! Sheesh. (Thanks) to the almighty above! #BackInNoTime,” tweet ni James.
Ayon sa Lakers, inaasahan nilang ilang laro lamang mawawala si James, ayon kay Chris Haynes ng Yahoo Sports.
Natalo ang Lakers sa Sacramento, 117-116 at sunod nilang haharapin ang Clippers.
Ang veteran forward ay na-injured noong Martes sa 127-101 upset win ng Lakers kontra sa Golden State Warriors nang madulas ito habang nagdi-drible patungong basket.
Napailalim ang kanyang kanang binti nang ma-out-balance ito kaya na-puwersa ang ang kanyang kaliwang binti at groin nang pilit nitong isalba ang bola.
Naglakad si James na halatang may nararamdamang masakit palabas ng court at nakita rin siyang iniinda ang nararamdamang sakit malapit sa bench kausap ang trainers.