PBA opening inurong sa Miyerkules

MANILA, Philippines – Dahil na rin sa pagragasa ng bagyong ‘Lando’ ay nagdesisyon ang Philippine Basketball Association na ipagpaliban ang kanilang season opener kahapon sa Smart Araneta Coliseum.

Mula sa Big Dome ay ililipat ang 41st PBA season opening sa Miyerkules sa Mall of Asia Arena sa Pasay City.

Muling itatampok ang banggaan ng Star, ipaparada ang bagong coach na si Jason Webb at ng Rain or Shine sa pagsisimula ng PBA Philippine Cup.

“The PBA decided to postpone (yesterday’s) season opener due to bad weather. Instead we shall have our formal opening on Wednesday with the same game to be played. The safety of our people is our priority,” wika ni PBA Commissioner Chito Narvasa.

Dahil magkaiba ang ticketing system ng Smart Araneta Coliseum at ng Mall of Asia Arena ay ire-refund ng PBA ang mga nabiling tiket para sa PBA opener sa Big Dome.

Ang mga laro naman sa Miyerkules ay muling hahanapan ng petsa.

Maglalaban sana ang Barako Bull at ang Mahindra sa alas-4:15 ng hapon kasunod ang bakbakan ng Ginebra at Meralco sa alas-7 ng gabi.

Bunga ng pagbabago ng petsa ng pagbubukas ng PBA season ay maaaring magbago ang mga muses na sina Ateneo volleyball star Alyssa Valdez (Talk ‘N Text), La Salle volleyball player Mika Reyes (Barako Bull), Miss Global International 2014 second runner-up Catherine Almirante (Star), Mutya ng Pilipinas 2015 first runner-up Julie Ann Marie Bourgoin (Rain or Shine), Max Collins (Blackwater), Jinkee Pacquiao (Mahindra), ang magkakapatid na triathletes na sina Sam, Tara at Chezka Borlain (Alaska), singer/actress Arci Muñoz (Ginebra), volleyball stars Rachel Anne Daquis at Fil-Am Alexa Micek (San Miguel), artist Karylle (Globalport), Miss Universe Philippines 2014 MJ Lastimosa (NLEX) at actress Eula Caballero (Meralco).