Tigresses diretso sa dalawang sunod
MANILA, Philippines - Nagpatuloy ang magandang paglalaro ng UST Tigresses nang kunin ang ikalawang sunod na panalo laban sa Adamson Lady Falcons, 25-19, 25-16, 23-25, 25-15, sa 77th UAAP women’s volleyball kagabi sa The Arena sa San Juan City.
Malakas na panimula ang nakita sa koponan na hindi rin natinag kahit natalo sa ikatlong set na kungsaan lumamang sila ng anim, para ilista ang kauna-unahang winning streak.
Si Ennajie Laure ay may 19 puntos na sinangkapan ng 16 kills, habang ang mga beteranang tulad nina Pamela Lastimosa, Marivic Meneses at Carmela Tunay ay nagsanib sa 42 puntos.
Maganda uli ang tugon ni Tunay sa playing time na ibinigay sa kanya dahil may limang blocks pa siya bukod sa 10 digs.
Si Meneses ay may limang blocks para sa UST na umakyat sa 3-5 baraha at kasalo na ang Adamson sa ikaanim at pitong puwesto.
Bago ito ay tinalo ng FEU Lady Tamaraws ang UE Lady Warriors, 25-16, 25-17, 22-25, 25-18, para lumapit sa kalahating laro sa ikaapat na puwesto sa 4-5 baraha.
Makakasalo ang FEU sa mahalagang upuan kung matatalo ang UP Lady Maroons (4-4) sa La Salle Lady Archers ngayong hapon.
Sina Bernadette Pons at Remy Palma ay may 14 at 11 hits para pangunahan ang koponan na tinapos ang two-game losing streak sa pagwalis sa dalawang laro laban sa UE.
Sa men’s division, tinalo naman ng FEU Tamaraws ang UP Maroons, 5-21, 25-18, 18-25,22-25,15-10, habang nanalo rin ang La Salle Archers kontra sa UE Warriors, 25-15, 22-25, 25-20, 25-22. (ATan)
- Latest
