MANILA, Philippines - Nagsosyo sa liderato ang Adamson University at National University sa men’s division, habang bumandera naman ang Far Eastern University sa women’s class sa UAAP Season 77 chess tournament na idinaos sa 4th floor ng Henry Sy Bldg. sa De La Salle University campus.
Nagsulong ang Falcons ng 2.5-1.5 panalo laban sa University of Santo Tomas sa opening round kasunod ang paggupo sa University of the Philippines, 3.5-1.5, sa second round.
Sa pamumuno ni 2014 Rookie of the Year Austin Literatus, pinatumba naman ng Bulldogs ang Ateneo, 3-1, sa first round bago isinunod ang defending champion Far Eastern University, 3-1, sa second round.
Nagtala ang Adamson, ang runner-up noong nakaraang taon, ng 6.0 points kagaya ng NU kasunod ang UST (5.5).
Sumandal naman ang Lady Tamaraws sa panalo ni WIM Janelle Mae Frayna laban kay MVP at WIM Jan Jodilyn Fronda sa Board 1 para daigin ang De La Salle, 2.5-1.5, sa opening round bago payukurin ang University of the East, 3-1, sa second round.
Nagposte ang FEU ng 5.5 points kasunod ang Lady Archers (5.0) na tumalo sa NU, 3.5-.5.
Magkasalo ngayon ang Tigresses at ang Lady Bulldogs sa ikatlong puwesto mula sa magkatulad nilang 4.5 points.