MANILA, Philippines – Matutunghayan ang gagawing pagdedepensa ni Filipino boxing hero at eight-division world champion Manny Pacquiao laban kay Chris Algieri sa GMA Channel 7 mula sa Cotai Arena sa Macau.
Masasaksihan via satellite ang salpukang tinaguriang “Pacquiao vs. Algieri: Hungry for Glory” sa GMA Channel 7 mula alas-11 ng umaga.
Maaaring sundan ang live blow-by-blow account ng banggaan nina Pacquiao at Algieri sa Super Radyo DZBB 594, Barangay LS 97.1 at sa lahat ng RGMA stations sa bansa simula alas-10 ng umaga.
Sa kanyang huling laban sa Macau ay pinatunayan ni Pacquiao na siya pa rin ang pinakamahusay na boksingero ng kanyang henerasyon nang dominahin niya si Brandon ‘Bam Bam’ Rios noong Nobyembre ng 2013.
Matagumpay na nadepensahan ni Pacquiao ang kanyang WBO welterweight belt sa kanilang muling paghaharap ni Timothy Bradley, Jr. sa Las Vegas, Nevada noong Abril.
Muling mapapanood ang laban nina Pacquiao at Algieri sa Sunday Night Box Office (SNBO) sa GMA Channel 7 sa ganap na alas 10:40 ng gabi.