INCHEON, South Korea -- Hindi nakayanan ng baguhang si Gay Mabel Arevalo laban kay SEA Games silver medalist na si Sru Nita Sari Sukatendel ng Indonesia para mamaalam agad sa women’s -50kg kumite sa karate sa 0-8 iskor kahapon sa Gyeyang gymnasium dito.
Natapos na ang kampanya ng Pilipinas sa maagang pagyuko ng 20-anyos na si Arevalo para makontento ang anim na karatekas sa isang bronze medal na ibinigay ni Mae Soriano sa women’s -55kg. division.
Lumabas na kampeon sa karate ang bansang pinagmulan ng contact sport, ang Japan, na may tatlong ginto, isang pilak at tatlong bronze medals habang ang isa pang malakas sa larong ito na Iran ang pumangalawa bitbit din ang tatlong ginto at dalawang bronze medals.
Ang Malaysia ang siyang pinakamahusay sa hanay ng South East Asia na kumuha ng dalawang ginto at dalawang bronze medals para pumang-apat sa pangkalahatan kasunod ng Kazakhstan na mayroong 2-3-1 medal count.