Sa 2013 Yalin Women’s World 10-Ball event: Amit ginulat ng Taiwanese player

MANILA, Philippines - Naunsiyami ang asam ni Rubilen Amit na bande­rahan ang Group 7.

Ito ay matapos siyang ma­­kalasap ng 2-6 kabigu­an kay Ho Yun Tan ng Chi­nese-Taipei sa 2013 Ya­lin Women’s World 10-ball Championship ka­hapon sa Resorts World Ma­nila.

Naipanalo na ni Amit ang unang dalawang racks at handa ng kunin ang pangatlong rack nang su­mablay siya sa paghulog sa 9-ball.

Dito na nagbago ang tum­bok ni Amit.

Dahil dito ay tumaas ang kumpiyansa ni Ho na maipanalo ang sumunod na anim na racks na pi­nag­labanan.

Bunga nito, si Amit na nanalo muna kina Bi Zhu Qing ng China, Marika Poikkiokki ng Finland, Angeline Ticoalu ng Indo­ne­sia, at ang kababa­yang si Iris Rañola sa iisang 6-3, ay tumapos taglay ang 4-1 karta.

Ang 48 manlalaro na ka­sali sa torneo ay hinati sa walong grupo at ang apat na mangungunang pla­yers ay papasok sa knockout stage.

Base sa kanilang win-loss record, ikakategorya ang mga manlalaro at si Amit ay magbubukas ng kampanya sa Round-of-24 sa halip na sa mas ma­taas na round-of-16.

Hindi naman mala­yong si Amit, na imbitado ng organizers bilang isang dating World Champion, ang nasa knockout stage dahil masama ang pani­mulang laro ng mga ba­tang cue artists na sina Cheska Centeno at Gillian Go na parehong may 1-2 baraha sa Groups 5 at 6, ayon sa pagkakasunod.

Hindi lang si Amit ang nabigo sa tangkang pagwalis ng limang laro dahil nakasama sa hanay si Siming Chen ng China na dinurog ni Yu Ram Cha ng Korea, 6-1.

Tumapos si Chen na bit­­bit ang 4-1 baraha sa Group 3, habang ang pa­na­lo ni Yu ang nagpalakas sa hangaring umabante sa susunod na round sa 3-2 baraha.