2013 William Jones Cup May 3 panalo na ang South Korea

MANILA, Philippines - Siguradong napag-aralan na ng mga ipinadalang scouts ng Pinas sa William Jones Cup ang South Korea na posibleng makaduwelo ng Gilas Pilipinas sa quarterfinal round ng da­rating na 27th FIBA-Asia Men’s Championships.

Inangkin ng South Ko­rea ang kanilang pa-ngatlong sunod na panalo matapos payukurin ang  US selection, 85-79, noong Lu­nes para pangunahan ang torneo.

Pinangunahan ni Talk ‘N Text coach Norman Black ang grupong ipinadala sa Chinese Taipei upang pag-aralan ang mga teams na posibleng makakalaban ng Gilas Pilipinas sa FIBA-Asia meet.

Nagbida para sa panalo ng Koreans si­na Lee Seung-jun, Kim Sun-hyung at Cho Sung-min.

Nauna nang binigo ng South Korea ang Egypt at ang Taipei-B.

Nakatakdang sagupain ka­gabi ng Korea, puma-ngatlo sa pinakahuling Asian meet sa Wuhan, Chi­na, ang Lebanon target ang kanilang ikaapat na sunod na arangkada.

Ang Jones Cup ang ginagamit ng South Korea bilang preparasyon sa FIBA-Asia Men’s Championships maliban pa sa pagsubok kina Lee (dating si Eric Sandrin) at Moon Tae Young (da-ting si Greg Stevenson) na kap­wa humahawak ng duel ci­tizenship papers.

Sa ilalim ng binagong FIBA rules, sina Lee at Moon ay ikinukunsi-derang mga naturalized players katulad nina Chris Ellis, Cliff Hodge at ilan pang mga bagong Fil-foreign players.

Gagamitin ng Koreans ang sinuman kina Lee o Moon na kanilang natura­lized player para sa Manila Asian meet na isang regional elimina­tion patungo sa 2014 FIBA World Cup sa Spain.

Ilang Korean-Ame­ricans ang kinaliskisan ng South Korea.

Nagtala si Lee ng 13 points sa kanilang six-point win laban sa Americans.

Ang Taipei at Jordan kasama ang Saudi Arabia ang makakalaban ng Gilas sa first round sa FIBA-Asia meet.