Hagdang Bato masusubukan sa PCSO Silver Cup ngayon

MANILA, Philippines - Muling ipakikita ng Hagdang Bato ang ang­king husay sa paglahok sa PCSO Silver Cup ngayong ha­pon sa Santa Ana Park sa Naic, Cavite.

Si Jonathan Hernandez ang hinete uli ng kabayo  na tatakbo para sa kuwadra ni Mandaluyong City Ma­yor Benhur Abalos at makakatuwang ng coupled entry na Barkley na hahawakan ni Val Dilema.

Sa mahabang 2,000-metro inilagay ang tampok na ka­rera na may post time na 4:30 ng hapon at itinalaga bi­lang race five.

Ang iba pang kasali ay ang Sulong Pinoy (FM Ra­quel Jr.), High Voltage (JB Cordero), Patron (JB Guce) at Chief Joesan (RR De Leon).

Itinataguyod ng Philippine Charity Sweepstakes Office (PCSO), ang karera ay sinahugan ng P3.8 mil­yong premyo at ang papalaring kabayo ay maghahatid ng P2.5 milyon gantimpala sa may-ari nito.

Ang papangalawa ay mayroong P700,000.00 prem­yo, habang P350,000.00 at P250,000.00 ang mapupunta sa papangatlo at pa­pang-apat sa datingan.

Nagdomina ang Horse of the Year noong  na­ka­raang taon sa PCSO Free­dom Cup at Commis­sio­ner’s Cup na inila­gay sa 1,600-metro at 1,800-metro noong Peb­rero at  Marso.

Ang inaasahang haha­mon sa Hagdang Bato ay ang Patron  na dating hawak ni JPA Guce pero ipinagkatiwala ngayon kay Jes­sie Guce.

Palaban din ang High Vol­tage matapos manalo sa dalawa sa huling tatlong sakay  sa pagdiskarte ni Jeff Zarate.

Si Cordero ang tinapik sa karerang ito at hindi ma­layong mapalabas pa ng hinete ang husay ng High Voltage.