MANILA, Philippines - Dalawang cagers ng Far Eastern University ang nahulihan ng marijuana sa Nicanor Reyes Street sa panulukan ng Recto Avenue sa University Belt area malapit sa FEU campus kahapon.
Ang dalawang varsity player ng FEU na hinuli dahil sa posesyon ng marijuana ay sina American center Anthony Hargrove, Jr. at Canadian Adam Mohammed.
Nakuha kina Hargrove at Mohammed ang dalawang marijuana sticks at sachet ng pinatuyong dahon ng marijuana.
Ang dalawang Tamaraws players ay dinala ng mga pulis sa MPD Station 4 sa distrito ng Sampaloc at nahaharap sa paglabag sa Comprehensive Anti-Drugs Act.
Sa kanyang UAAP debut noong nakaraang season, nagposte si Hargrove ng mga averages na 7.6 points, 7.7 rebounds at 1.1 shotblocks, samantalang nagsisilbi pa ng kanyang residency si Mohammed para sa Tamaraws.
Sa ilalim ng Republic Act 9165, ang parusa sa taong nahulihan ng ipinagbabawal na gamot o droga ay pagkakakulong ng mula 12 taon at isang araw hanggang 20 taon bukod pa ang multang P300,000 hanggang P400,000.