Tatay proud sa buntis na gf

Dear Vanezza,

Sobrang inis ko sa tatay ko na feeling proud na nag-send ng picture na buntis ang GF niya. Kahit matagal na silang hiwalay ng nanay ko. Naiinis lang ako na lumaki nga akong wala siya sa tabi namin dahil sa pagiging addict at pag-iinom niya. Tapos ngayon nagpapakabayani siyang maging tatay sa iba. Gusto pa niya ay makita namin ng kapatid ko ang buntis niyang GF. Ayaw nga namin ni kuya. Ano ba ang dapat namin gawin? - Anna

Dear Anna,

Hindi naman ninyo kailangang magpapilit dahil may sarili na kayong pag-iisip. Lalo na kung labag sa inyong kalooban na tiyak ay hindi rin magi­ging maganda ang iyong pagkikita. Huwag mo na lang isipin ang nasabing picture. Bigyan mo rin ng chance si tatay na magbago. Maaaring gusto lamang niyang bumawi ngayon bilang tatay, hindi man sa inyong magkapatid, kundi sa magiging anak niya ngayon.

Sumasainyo,

Vanezza