Nagpa-part time GRO

Dear Vanezza,

Isa akong 21 yrs. old working student. Nakakahiya man, ako po ay part time GRO sa isang club. Ulilang lubos na po ako at walang maaasahan sa aking pag-aaral kundi ang magsariling sikap. May nanliligaw po sa akin. Hindi niya alam ang trabaho ko. Mahal ko rin siya pero ayaw ko siyang sagutin dahil sa kalagayan ko. Ayaw ko namang magtapat sa kanya. Pero kahit GRO po ako ay hanggang table lang ako at hindi ako lumalabas. Talagang pagkita lang ng pera ang hangad ko para sa aking pag-aaral. Dapat ko bang bastedin ang manliligaw ko dahil sa trabaho ko? Please advice me. - Babe

Dear Babe,

Maging tapat ka sa kanya. Tanungin mo siya kung hindi ba magbabago ang pagtingin niya sa iyo kung malalaman niyang GRO ka. Kung mahal ka niya talaga, mamahalin ka niya ano ka man at sino ka man. Ipaliwanag mo rin ang sitwasyon at tingin ko’y mauunawaan ka niya na wala kang ibang matutuntungan para abutin ang iyong pangarap. Mabuti iyan at masusubukan mo ang kanyang katapatan. Sikapin mo ring maghanap ng ibang mapapasukan dahil sa ganyang trabaho ay malapit ang tukso.

Sumasaiyo,

Vanezza