Dear Vanezza,
May ka-live-in ako na nakilala ko lang sa text. Guwapo siya kaya lalo akong na-in-love sa kanya. Wala nang ligawang naganap dahil nang magkita kami ay nagkaroon na kami ng mutual understanding. Lumipas ang ilang buwan at nag-decide kaming magsama kahit tutol ang aking mga magulang. Umupa kami ng bahay at maligayang nagsama. Mabait siya at sunod ang layaw ko sa kanya kahit hindi niya sinasabi sa akin kung ano ang trabaho niya. Hanggang sa isang araw, may dumating na mga pulis sa amin at may dalang warant of arrest. Sangkot daw siya sa droga at itinuro siya na supplier ng naarestong pusher. Umuwi ako sa amin dahil ikinulong siya. Sabi ng magulang ko kalimutan ko na siya dahil wala raw akong kinabukasan sa kanya. Balak pa sana naming pakasal. Dapat ko ba siyang limutin?
- Jaz
Dear Jaz,
Maaaring nagmamahalan kayo, subalit tingnan mo rin ang kahihinatnan ng iyong buhay sa kanya. Walang masamang magpakasal kayo kung binata siya at dalaga ka. Pero kung magpapakasal ka sa kanya, papasanin mo pati problema niya. Paano kung mabilanggo siya nang matagal? Mabuting ayusin muna niya ang kanyang kaso at sakaling mapawalang sala siya sa bintang, saka n’yo pa lang maiaayos ang inyong pagsasama. Nasa sa iyo pa rin ang huling desisyon.
Sumasaiyo,
Vanezza