Boyfriend ko si kamatayan (8)

“OO NGA, Lezzy, tayo nga pala ay magkasintahan na.”

“Mag-syota ang mas gusto kong term. Super-classic ang magkasintahan. Luma na, Negro Angelo.” “Mas luma ang magsing-irog at magsing-giliw, Lezzy. Luma rin pero magandang pakinggan ang hirang,” sabi ni Negro Angelo, napapangiti.

“Nag-research ka ng old Tagalog words kaya alam mo, di ba?”

“No, Lezzy, nadaanan ko sila bago ako nakarating sa present time.”

“Hweh.” Nag-make face ang dalagang spoiled. “Hayan ka na naman sa biro mong super-super old ka na. Baka naman sabihin mong pati si Abraham Lincoln e kakilala mo nang personal?”

Sumeryoso si NA o Negro Angelo. “Nasa tabi ako ni Lincoln nang siya’y mamatay, Lezzy.”

“Corny! Ang boyfriend ko ay…corny!”

Napabuntunghininga si NA. “Wala naman talagang matutuwa sa akin, Lezzy. Tingin nila’y kalaban ako ng kasayahan.”

Nakadama ng awa sa boyfriend si Lezzy. “Hey, ako’y natutuwa sa iyo. I love you, Negro Angelo.”

Naghiwalay na sila sa lobby ng condo building. “Sa north ako ngayon. Doon ako naka-assign.”

“Ano nga uli ang trabaho mo, nasabi mo na ba sa akin?”

Umiling ang binata. “Hindi mo dapat malaman kung ano, Lezzy.”

“Wow. Misteryoso ka na naman. May ID ka or passport? Visa? Driver’s License?  Patingin.” Nagkibit-balikat si Negro Angelo. “Wala ako ng anumang minention mo, Lezzy. Hindi nga kasi ako ordinary…”

“Damn it, NA. Official girlfriend mo na ako, I need to know kung sino ka, tagasaan ka, etsetera.”

Umiling-iling si Negro Angelo. “Sorry talaga. Kung puwede nga lang bang magpakilala na ako sa iyo. Napapamahal ka na rin sa akin this early.”

Kahit paano ay naglubag ang kalooban ni Lezzy. “Sige, magkikita pa kami ni Lucille.”

Titig na titig sa malayo si Negro Angelo. Napapailing.

“NA, may problema na naman ba?”

“Mga kabataan ang sabay-sabay na nakatakda…”

“Nakatakdang ano?”

“Mamamatay sila, limang estudyante ng nursing.”

 (ITUTULOY)