Ayaw na sa mga lalaki

Dear Vanezza,

Ilang beses na po akong nasasawi sa pag-ibig. Lahat sila puro taksil. Two years ago ay may naka-live in ako. Isang taon din kaming nagsama. May negosyo akong buy and sell. Ako ang tumutustos sa mga pangangailangan niya. Pero natuklasan kong may iba siyang babae at ang perang ibinibigay ko sa kanya ay ginagastos niya dun sa babae. Nang hindi ko na siya mapagbigyan ay iniwanan niya ako. Masakit pero pinabayaan ko na siya. May dalawang iba pa akong nakarelasyon pero pareho rin sila ng una na puro mapaglaro sa pag-ibig. Matapos kong bihisan at sustentuhan ay iniwan din ako. Parang ayaw ko na sa lalaki. - Broken Hearted

Dear Broken Hearted,

Mali ang paraan mo ng pagmamahal. Ang tunay na pag-ibig ay hindi nakukuha sa pamamagitan ng materyal na bagay. Hindi ka umaaktong gf nila kundi sugar mommy. Pinabababa mo ang uri mo sa mata ng mga nakakarelasyon mo kaya pinaglalaruan ka lang nila. Kung palagi mong pakikitaan ng luho ang lalaki, para ka na rin bumibili ng iyong kaligayahan. Suriin mo ang iyong sarili at baguhin ang dapat baguhin.