MANILA, Philippines – Tunghayan ang kwento ng katatagan at inspirasyon ng isang OFW sa Dubai na sinuong ang lahat ng hamon para sa pamilya ngayong Sabado (Jan 16) sa MMK.
Bata pa lang si Lyn (Maricar Reyes) ay sinusubok na ng tadhana ang kanyang katatagan. Mula sa pagpanaw ng kanyang ama hanggang sa maaga niyang pagiging ina, matapang na hinaharap ni Lyn ang lahat.
Maging ang sariling pangarap maging abogado ay kanyang isinantabi para makipagsapalaran sa Dubai at mabigyan ng magandang buhay ang kanyang mga anak. Sa kasamaang palad ay naloko siya ng kanyang sponsor na nangakong hahanapan siya ng trabaho sa Middle East.
Paano ngayon haharapin ni Lyn ang kalbaryo sa ibang bansa na walang ibang malalapitan o masasandalan? Hanggang kailan niya kayang ilihim sa pamilya ang pagdurusang dinaranas?
Kasama rin sa upcoming episode ng MMK sina James Blanco, Lotlot De Leon, Simon Ibarra, Gerald Madrid, Bea Saw, Raquel Montessa, Minnie Aguilar, Ynez Veneracion, at Viveika Ravanes. Ang episode ay sa ilalim ng direksyon ni Nuel Naval, at panulat ni Benson Logronio.