MANILA, Philippines - Dininig ng Toda Max ang hiling ng mga manonood na ibalik ang pinakakuwela at nakakaaliw na episodes ng sitcom sa taong 2012 kaya naman ngayong huling Sabado ng taon (December 29), magtitipun-tipon ang buong cast para magbalik-tanaw.
“Sobrang dami pong nangyari sa unang taon ng Toda Max na talagang nagpaligaya sa amin. Unang-una po ‘yung magandang pagtanggap ng mga manonood sa pagbabalik ng sitcom sa ABS-CBN, pangalawa ‘yung pagkapanalo ng show ng dalawang Best Comedy awards at pangatlo, ang pagse-celebrate namin ng first anniversary,” masayang ibinahagi ni Vhong Navarro, isa sa lead cast ng sitcom.
Kaya bilang year-ender special nila, babalikan ang mga ‘di malilimutang eksena na nagpatawa sa libu-libong sumusuporta sa kanila, ani Angel Locsin. “Ito pong pagbabalik-tanaw ay para po sa mga masusugid na sumusuporta sa Toda Max. Maraming salamat po sa inyo at maligayang bagong taon!”
Hindi pa man umaabot ng isang taon matapos i-launch ang Toda Max ay nanalo na ito ng dalawang Best Comedy Show awards mula sa Catholic Mass Media Awards at PMPC Star Awards for TV habang ang mga aktor nito na sina Robin Padilla at Pokwang ay nag-uwi ng Best Comedy Actor at Best Comedy Actress awards mula sa PMPC.
Abangan ang Toda Max sa ABS-CBN pagkatapos ng Maalaala Mo Kaya ngayong Sabado (December 29) kung saan magtitipon-tipon sina Lady G (Pokwang), Tol (Robin), Isabel (Angel), Justin (Vhong) at buong taga-Beverly Gil’s St upang balikan ang magagandang pangyayari sa kanilang buhay.