Lokal nga kampanya nisikad na

CEBU, Philippines — Pinaagi sa pagtambong sa Santos nga Misa, nisikad ang unang adlaw sa lokal nga pagpangampanya alang sa upat ka partido nga nagtinguha og posisyon sa kagamhanan sa Dakbayan sa Sugbo.

Ang tulo ka partido nga mao ang Partido Barug-BagOng Sugbu, Kusug-Panaghiusa Coalition, Partido Cebuano mitambong sa Misa sa Cebu Metropolitan Cathedral samtang ang Bando Osmeña – Pundok Kauswagan (BOPK) nitambong sa Archdiocesan Shrine of Our Lady of Guadalupe de Cebu sa Barangay Guadalupe. Human niini nakighimamat sila sa ilang mga taga-suporta sama sa Partido Barug-BagOng Sugbu mibisita sa Basilica Minore del Santo Niño, Plaza Sugbo ug sa Carbon Public Market ug nakiglamano sa mga kawani sa City Hall nga gipanguluhan ni kanhi Cebu City mayor Michael Rama ug ni Bise Mayor Donaldo Hontiveros ug sa mga konsehales niini.

Mao sab ang gibuhat sa Kusug-Panaghiusa Coalition kun diin matag buhatan sa City Hall mao ang gibisita nila ni Mayor Raymond Alvin Garcia ug Atty. Joey Daluz kinsa magpapili isip bise mayor. Kauban nila si Congresswoman Rachel “Cutie” del Mar ug ang mga konsehales sa maong partido.

Palahi sab ang gibuhat sa ni kanhi Customs commissioner Yogi Ruiz sa Partido Cebuano kay nagpahigayon kini og press conference sa Golden Prince Hotel sa Barangay Kaputhaw.

Ang BOPK nga gipanguluhan sa tandem ni Konsehal Nestor Archival ug kanhi mayor Tomas Osmeña lakip na si Konsehal Mary Ann delos Santos, nakighimamat sa ilang mga taga-suporta gawas sa simbahan sa Guadalupe ug nagpahigayon og hamubo nga panagtigom aron subli nga ipa-ilaila ang mga molansar nga mga kandidato.

Si Nestor Archival mipahinumdom sa katawhan nga dili ibaylo ang malungtaron nga programa ngadto lang sa pagdawat og bugas ug kwarta gikan sa mga magpapili nga mga kandidato.

Sa bahin sab ni Garcia, nagmalaumon nga wala nay fake news nga himoong personal nga pangatake batok kaniya karong panahon sa eleksyon.

Dugang pa ni Garcia nga mas maayo nga motutok nalang ang mga kandidato sa pagpresentar sa ilang mga plataporma ngadto sa kinabag-an kaysa mangdaot kini sa isig ka atbang sa politika.

Samtang si Ruiz  mituki sa iyaang mga plataporma nga makaayo gyud sa kadaghanan kun diin tinguha gyud niya ang bag-ong sinugdanan alang sa mas maayo ug luwas nga dakbayan.  Sa laing bahin, nibisita sa Lungsod sa Sibonga ug Barili si senatorial candidate Ramon Bong Revilla Jr., isip kabahin sa campaign trail niini nga suportado sa mga local officials ug ubang iladong political leaders.  Nagpasalamat si Revilla sa paghangop sa katawhan sa Sugbo niya ug iyang gipasalig nga magpadayon kini sa pagtrabaho alang sa kaayohan sa katawhan sa nasud.

Si Revilla kinsa magpapili pagka senador kanunay nasulod sa top 5 major surveys nationwide.

Gawas sa pagbisita sa 16 ka Lungsod sa Probinsya sa Sugbo mobisita sab kini sa Mandaue City ingon man sa Lungsod sa Consolacion karong adlawa.

Gihisgutan ni Revilla ang iyang mga key legislative proposal, nakatutok sa panginahanglanon sa senior citizens ug mag-uuma, duha ka grupo tinguha niyang tabangan kun makalingkod sa Senado.

Gihulagway sa Cebu City Police Office (CCPO) nga hapsay ang unang adlaw sa campaign period sa mga local candidates ilabi na dinhi sa Cebu City.  Sa pagkutlo ning maong balita wala sila'y na-monitor nga nga kalihukan nga makapaalarma. Wala sab sila'y nadawat nga sumbong may labot sa mga nakalapas sa lagda sa COMELEC.  -- Rowena Capistrano ug Decemay P. Padilla/IBM BANAT NEWS