1st Cebu Deep Blue Christmas Chess Open gitakda

 CEBU, Philippines -  Maghugop ang mga tang-ang chess masters sa Visayas ug Mindanao alang sa 1st Cebu Deep Blue Christmas Chess Open nga mosikad karong Disyembre 21 diha sa Deep Blue D'Woodpusher's Club sa second floor sa SM City-Cebu.
 Ning pagsulat, may 50 na ka chess masters ang mipadayag sa ilang partisipasyon ning tulo ka adlaw nga torneyo.
 Kini naglakip ni Cebuano Grand Master Enrico 'Ikoy' Sevillano, Richard Bitoon ug International Master Kim Yap.
 Mokabat ngadto sa P43,800 nga ganting salapi ang giandam  alang sa mga mananaog sa maong torneyo  nga gipaluyohan  ni Cebu 3rd District Rep. Pablo Garcia,  Atty. Mariano Tan, Carlos Tan, Jongjong Melendez, Atty. Ben Harayo, Engr. Jhon Capital, Rene Bacolod, Engr. Ehti Dominguito, Kitting Moro, Kobe Roleda, Nestor Encallado ug Atty. Tomas Riveral sa OPASCOR.
 Ang kampiyon mobulsa og P15,000 uban ang limited edition nga Zoo York wrist watch nga nagkantidad og P25,000 kortesiya ni Deep Blue 'D Woodpusher's Club owners Molit ug Maricris Hortelano. Ang first runner-up makadawat og P8,000, ang losing semifinalists  makadawat og P3,000 matag usa, samtang ang quarterfinalists makaangkon og P1,500 matag usa.
 Ang moabante sa top 16 segurado na nga makadawat og P500, samtang ang mga makalusot sa final 32 mobulsa og P300.
 Ang maong chess tournament magsilbe usab nga fund-raising program diin ang matigom nga salapi itabang ngadto sa mga kabus ilabi na karong panahon sa Pasko.
 Sa mga interesadong mosalmot, ang registration fee nagkantidad og P300.  Alang sa dugang mga pangutana, mahimong motawag ni international arbiter Marvin Ruelan sa numero 0926-7352951.  (BANAT SPORTS)