Ayaw na ko’g kasilagi

Unom pa lang gani ka bulan ang ilang panagluon sa salag sa kaminyoon duna nay gikabuangan si Rufo nga laing babaye. Kining iyang gibuhat nga duna siya’y uyab wala pa mahibaw-i ni Sonya. Tua siya kanunay sa merkado kay duna man siya’y sari-sari store.

Si Rufo foreman sa usa ka dakong kompaniya didto sa siyudad. Apan kay wala man gyoy aso nga makumkom, nahibaw-an ra gayud ni Sonya ang tanan nga si Rufo dunay kabit nga ginganlan og Stephanie. Batan-on ug guwapa ug gigastuhan ni Rufo sa kolehiyo.

 “Duna diay kay babaye, Rufo! “Imo lang diay kong gibinuangan. Maypag wala nalang ko makigminyo nimo. Mao diay nga gamay nalang ang ihatag nimong suweldo kay duna ka diay gigastohan, ang imong babaye!”

“Aw, nahibawo na diay ka, ayaw na lang og saba. Gusto gani nako nga magbuwag ta, Sonya. Wala ka nay lami alang nako,” ni Rufo nga mipahayag ngadto sa asawa.

Tuod nagbuwag gyud sila si Sonya ug Rufo. Si Rufo didto na moipon kang Stephanie kay nag-abang man sila og apartment. Si Sonya nagpadayon sa iyang panginabuhi nga mao ang paninda sa merkado. Unya may usa ka adunahang biyudo ang nahigugma kang Sonya. Gisugot kini ni Sonya. Karon, ingon sa luagluag na ang pamati niya sa iyang dughan nga kaniadto naghuot pa. Unya, human sa pagpanglabay sa daghang katuigan may usa ka lago nga mora’g makililimos ang bayhon nga nagtuk-ong sa gawas sa gate sa dakong balay ni Sonya. Nakaila siya nga kini mao si Rufo nga gibiyaan diay sa batan-on niyang kabit. “Nganong nia ka? Unsay imong gianhi, ha, Rufo?” dihay kaligutgot sa tingog ni Sonya.

“Sonya, pasayloa tawon ko, imo kong bana. Bisa’g nagbuwag na ta wala pa malaksi o magisi ang balaang sakramento nga nagdugtong kanatong duha. Kinasal ta, uhu, uhuuuu, uhuu...” ni Rufo nga namulong inubanan sa kagalgal niining ubo-ubo.

“Rufo, hangtud karon nia pa gihapon ang kasilag ko nimo,” ni Sonya nga mitaas ang tingog. “Lakaw na, kay ipapaak tika unya sa akong mga iro...!” (Kataposan)

Panadtaran, San Fernando, Cebu