Mamugnaong taming: Sige bye, 2012

Nahulog ang tabil

Nadayag ang tanan

Ngulngol ang tampaling

Nga imong pagabiyaan

Nagtangag kag kalbaryo

Hapdos nga latos

Gigawngan mo kami

Tampalasan mong unos

Apan inay kami mapukan

Sa imong kalampingasan

Dali kaming mobarog

Hinugpong nga kusog

Nag-aliwaros si Pablo

Gidalit ang kangutngot

Nahagsa si Pacquiao

Gisilbi ang kaaligutgot

Apan inay kami mapukan

Gibayaw si San Pedro

Panalangin nagtuasik

Kabulahanan nagtaligsik

Midaog si Donaire

Misabat si Tugonon

Dili kami mapukan

Banay nga madaogon

Usa ka lang ka panahon

Umalagi, lumalabay

Bag-ong tuig mohulip, moalim

Sa mga pagsuway mong gibilin