Inahan, anak  patay sa sunog

CEBU, Philippines — Wala na makagawas nga buhi ang usa ka inahan ug ang iyang anak nga babaye human masunog ang ilang balay sa Purok Determinado, Barangay Tabunok, Talisay City, Cebu, sayong kabuntagon, Martes, Nobyembre 10, 2026.

Giila ang mga namatay nga sila si Amalia Nebrija, 62 anyos, buyuda,  ug iyang anak nga si Grace Joy Nebrija, 22, nga tinun-an sa kursong Nursing sa usa ka unibersidad sa Cebu City.

Base sa report sa Bureau of Fire Protection (BFP), nadawat ang alarma bahin sa sunog alas 3:09 sa kaadlawon ug miabot dayun ang mga bombero sa lugar.

Gideklarar ang unang alarma alas 3:14, nakontrolar ang kayo alas 3:30 ug hingpit nga napalong alas 3:40 sa kaadlawon.

Samtang gibanabanang P90,000 ang kantidad sa nangasunog nga kabtangan. Ang balay sa manag-ihan duha ka andanang mixed-material nga balay.

Padayon pang giimbestigahan sa mga otoridad ang hinungdan sa sunog ug ang mga sirkumstansiya nga miresulta sa pagkamatay sa inahan ug anak. Apan basi sa pasiunang imbestigasyon, nasayran nga tig-ampo ang inahan kada kadlawon ug gidudahan nga wala napawong nga kandila ang nakaingon sa sunog.

Apil sab sa gisusi sa mga bombero ang faulty electrical connections ang hinungdan sa maong sunog.—  IBM BANAT NEWS