Road Warriors nakauna sa Fuel Masters
MANILA, Philippines —Inangkin ng NLEX ang 1-0 lead sa kanilang best-of-five quarterfinals series ng Phoenix matapos ilusot ang 97-92 panalo sa Season 50 PBA Governors’ Cup kahapon sa Ynares Center sa Antipolo City.
Humakot si import Deonte Burton ng 27 points, 11 rebounds, tatlong blocks at tatlong steals para sa Road Warriors, ang Group A No. 1 team.
Nagdagdag si Robert Bolick ng 20 points, habang may 13 at 11 markers sina Schonny Winston at Tony Semerad, ayon sa pagkakasunod.
Nasayang ang paghahabol ng Fuel Masters, ang fourth-ranked squad sa Group B, mula sa isang 15-point deficit sa third period.
“Phoenix has been a resilient team through out the conference. So it’s expected that they’ll continue to play,” sabi ni coach Jimmy Alapag. “And again they clawed and fight through out the game but I thought down the stretch we made enough plays, ecpecially in the defensive end.”
Ang dalawang free throws ni Burton ang nagbigay sa NLEX ng 94-89 abante sa huling 1:50 minuto ng fourth quarter.
Tumirada ng jumper si import Marcellus Earlington na sinundan ng free throw ni Ken Tuffin na nagdikit sa Phoenix sa 92-94 agwat sa nalalabing 23 segundo.
Nagsalpak ng isang foul shot si LJ Gonzales mula sa technical foul ni Earlington, habang ang dalawang free throws ni Burton ang muling naglayo sa Road Warriors sa 97-92 sa huling 13.8 segundo.
Nauna nang nabaon ang Fuel Masters sa 17-27 sa first period at sa 56-71 sa third quarter bago ibinalik sa laro nina Ricci Rivero, Kai Balunggay at Gian Mamuyac.
Tumapos si Rivero na may 24 points para sa Phoenix at may 20, 14 at 11 markers sina Balunggay, Earlington at Mamuyac, ayon sa pagkakasalansan.
- Latest
