NLEX paborito vs Phoenix sa quarterfinals

MANILA, Philippines — Ang Group A No. 1 NLEX ang sasagupa sa Group B No. 4 Phoenix, habang hahamunin ng Group B top seed Magnolia ang Group A fourth ranked at nagdedepensang TNT Tropang 5G sa crossover quarterfinal round ng Season 50 PBA Governors’ Cup.

Lalabanan ng Road Warriors ang Fuel Masters ngayong alas-5:15 ng hapon kasunod ang salpukan ng Hotshots at Tropang 5G sa alas-7:30 ng gabi sa Game One sa Ynares Center sa Antipolo City.

Parehong nagmula sa kabiguan ang NLEX at Phoenix sa kanilang mga huling laro sa eliminations.

Natalo ang Road Warriors sa San Miguel Beermen, 133-135, habang yumukod ang Fuel Masters sa Rain or Shine Elasto Painters, 103-133.

“I’m looking forward to it. I think it’s more, for me, ‘yung players, how we adjust. Kasi, I think a lot of guys on our team actually haven’t been in a series like this. If they were there naman hindi pa sila ‘yung main guys,” wika ni Phoenix coach Charles Tiu sa pagharap nila sa NLEX.

Samantala, aminado si Hotshots coach LA Tenorio na dehado sila sa kanilang serye ng Tropang 5G.

“Of course TNT, may extra sila kasi they’re very seasoned team, very, very well coached, ‘yung experience nila ng championship,” sabi ni Tenorio sa tropa ni mentor Chot Reyes. “Going into the quarterfinals, we just have to be ready and we have to be up to the challenge.”

Sa iba pang pares, ha­harapin ng Group A No. 2 San Miguel ang Group B No. 3 Barangay Ginebra at magtutuos ang Group B No. 2 Rain or Shine  at ang Group A No. 3 Converge.

Muling sasalang sa isa pang best-of-five series sa semifinals ang apat na mananalo sa quarterfinals.