Unahan sa ‘twice-to-beat’ bonus sa SSL quarters
MANILA, Philippines — Simula na ng agawan para sa quarterfinals ‘twice-to-beat’ advantage sa 2026 Shakey’s Super League (SSL) Unity Cup Round of 8 sa Imus Sports Complex sa Cavite.
Haharapin ng unbeaten defending champion National University ang College of Saint Benilde ngayong alas-3 ng hapon kasunod ang upakan ng Adamson University at Far Eastern University sa alas-5 sa Pool E.
Sa unang laro sa alas-11 ng umaga magtutuos ang University of the Philippines at reigning NCAA champion Letran sa Pool F, habang maglalaban ang University of Santo Tomas at Ateneo De Manila University sa ala-1 ng hapon.
Winalis ng Lady Bulldogs ang apat na laro sa elimination round para sa kanilang ‘five-peat’ bid sa torneong itinataguyod ng Shakey’s Pizza Parlor, Peri-Peri Charcoal Chicken, Potato Corner at R&B Milk Tea.
“Since all-to-play ang format, having your other players stepping up on their game is of huge importance kasi not all the time our senior players will play their A-game, and if you have your second team playing competitively as well, malaking advantage para sa amin,” ani coach Norman Miguel.
Nagtala naman ang Lady Blazers ng 2-1 marka sa opening round ng event na suportado ng Philippine Sports Commission, the Commission on Higher Education, Mikasa, Asics, Rigour Technology, Jersey Haven, Solar Sports at 12 Beyond Production bilang technical partners.
“Having this chance and opportunity to play against UAAP teams, that’s a big thing for us,” sabi ni CSB team captain at main setter Zen Basilio.
- Latest
