June Mar mikab-ot og laing dungog sa iyang karera

CEBU, Philippines — Ang Sugboanong sentro sa San Miguel Beer nga si June Mar Fajardo mikab-ot og laing kadungganan sa masilakon niyang karera.

Kini human ang garbo sa lungsod sa Pinamungajan nahimong labing bag-ong miyembro sa 10,000-point club sa liga.

Nahimo siyang ika-19 nga miyembro sa tinamod nga grupo .

Ang nine-time MVP miangkon sa maong dungog sa nahibilin nga 1:22 sa unang kuwarter atol sa 135-133 nga kadaogan sa Beermen batok sa NLEX Road Warriors duha ka gabii ang milabay..

Si Fajardo mitapos sa duwa uban ang 26 puntos ug karon aduna na siyay 10,021 puntos nga natigum sa 14 ka tuig na niyang pagsalida sa PBA.

“Na nasa San Miguel ako, napapaligiran ako ng mga taong gumagabay sa akin, na tumutulong sa akin,” matud pa sa 36-anyos nga Fajardo.

“Sobrang blessed ko na thankful ako kay God sa height na ibinigay niya sa akin at sa mga taong ibinigay niya para mag-guide sa akin,” dugang pa sa 6-foot-11 nga sentro.