Masakpang magdaob ipadakop sa Cebu City

CEBU, Philippines — Ipadakop ni Cebu City Mayor Nestor Archival ang mga masakpang magdaob nga mga molupyo sa siyudad tungod kay supak kini sa balaod.

Matud ni Archival nga kinahanglan nga butangan og ngipon ang maong balaod tungod sa padayon nga gikabalak-ang kahimtang sa kalidad sa hangin sa siyudad diin giklasipikar sa Environmental Management Bureau (EMB) nga “very unhealthy”.

Gikwestiyon ni Archival ang pagklasipikar sa EMB nga ang kahimtang sa hangin sa Sugbo resulta lang sa local haze o aso ug hugaw nga naggikan sa lokal nga tinubdan.

Si Archival nagkanayon nga posible usab nga adunay natampo ang forest fire nga gikan sa Indonesia.

Matud usab ni Archival nga dili ingon ana kaabog ang Sugbo kong wala mahitabo ang forest fire.

Ug tungod sa kasamtangang kalidad sa hangin momando ang mayor sa mga barangay nga hugtan ang pag-monitor ug pagpahimangno sa mga molupyo nga nagdaob og basura.  Iyang gihimug-atan nga kinahanglang dakpon ang mga masakpan nga molapas sa balaod nga nagdili sa pagsunog og basura.

Samtang, mangayo ang kagamhanan sa Department of Environment and Natural Resources (DENR) og smoke belching machine aron masusi ug mapanubag ang mga sakyanan nga sobra ang pagbuga og aso ilabi na ang mga trak nga naggamit og krudo. Gipasabot ni Archival nga adunay pasiunang kahimanan nga gihatag ang DENR, apan alang lang kini sa mga sakyanang naggamit og gasolina. Pinaagi niini, gilaoman sa kagamhanan sa siyudad nga mas mapalig-on ang pagpatuman sa mga regulasyon sa kalidad sa hangin ug matubag ang mga kalihokan nga mahimong makapasamot sa polusyon sa Dakbayan sa Sugbo.  BDB BANAT NEWS