LeBron misidlak sa iyang pre-season debut sa 76ers

CEBU, Philippines — Si NBA superstar LeBron James mihimo og impresyon sa iyang pre-season debut uban sa Philadelphia 76ers kagahapong adlawa.

Mao kadto ang unang tsansa ni James nga makaduwa uban ang bag-o niyang mga teammates nga sila si Joel Embiid, VJ Edgecombe, Tyrese Maxey ug Jaylen Brown, nga bag-ong salta sab sa Philadelphia gikan sa Boston Celtics.

Gipildi man tuod sila sa Nets didto sa Brooklyn, 114-108, apan ang 41-anyos nga si James mikuha og atensiyon.

Ang NBA all-time leading scorer mipupo og 10 puntos uban ang upat ka rebounds, lima ka assists ug usa ka steal sa 18 minutos lamang niyang pagduwa sa first half.

Si James mipasud sa bugtong niyang field goal ug walay sipyat sa walo niya ka free throws. Mihimo dayon og kasikas si Brown uban ang 18 puntos alang sa Sixers.

Si Julius Randle mitali og 14 puntos alang sa Nets, nga milampaso sa Sixers, 37-23, sa ikatulong kuwarter aron kontrolahon ang duwa sa hingpit.

Ang 76ers aduna pay duha ka pre-season games, pulos batok sa Celtics, sa dili pa mosikad sa ilang kampanya sa 2026-27 NBA season batok sa defending champion New York Knicks karong Oktubre 21 (oras dinhi sa Pilipinas) didto sa Madison Square Garden.