3 bronze sa Pinas
Mula sa women’s soft tennis at MMA
MANILA, Philippines — Ang national women’s soft tennis team ang kaagad naglagay sa Pilipinas sa medal tally matapos humataw ng bronze medal sa 20th Asian Games sa Aichi-Nagoya, Japan.
Dalawa pang tanso ang isinunod nina Pinoy mixed martial artists Jean Claude Saclag at Carlos Alvarez sa kanilang pagmartsa sa semifinal round.
Sisimulan naman ni Paris Olympics double-gold medalist Carlos Yulo at utol niyang si Eldrew Yulo ang kampanya sa men’s artistic gymnastics.
Bago pa man ang opening ceremony ay tumiyak na ng bronze medal sina Pinay netters Bien Zoleta, Princess Catindig, Shyryn Salazar, Christy Sañosa at Hilary Paas nang sumampa sa semifinals ng women’s team event.
Ngunit nadiskaril ang kanilang pagpasok sa finals nang makalasap ng 0-2 kabiguan sa nagdedepensang Japan sa semis kahapon sa Nagoya City Higashiyama Park Tennis Center.
Ito ang kauna-unahang Asiad medal ng Pilipinas sa soft tennis sapul nang sumali noong 1994.
Puwede namang mangarap ng gold o silver sina Saclag at Alvarez sa kanilang pag-abante sa semifinals.
Dinomina ni Saclag si Saud Fawaz Almolhem ng Saudi Arabia via unanimous decision sa quarterfinals ng men’s traditional -65 kilogram division at binugbog ni Alvarez si Wahyu Setyost Ananda Wahyu Setyo ng Indonesia sa men’s traditional -77kg
May tsansa sina Saclag at Alvarez sa gold kung mananalo sa semis ngayong araw.
Bubuksan ng magkapatid na Yulo ang kanilang misyon sa pagsabak sa men’s all-around event ng gymnastics.
Hindi pa nananalo ng Asiad gold ang 26-anyos na si Yulo na wagi ng dalawang ginto sa 2024 Paris Olympics bukod sa pagiging isang three-time world champion, eleven-time Asian winner at nine-time SEA Games king.
Sa swimming, na-disqualify sina Kayla Sanchez, Xiandi Chua, Heather White at Teia Salvino sa women’s 4x100m freestyle relay finals.
Hindi pa kasi nakakahawak si Chua sa touch pad ay kaagad tumalon sa tubig si Salvino.
Sa wushu, pumuwesto si Agatha Wong sa 10th place sa women’s taijiquan & taijijian, habang hindi nakapasok si Jenifer Kilapio sa quarterfinals ng women’s sanda -52kg.
Sa teqball, minalas ang 14-anyos na si Prince Agustin sa tanso nang matalo kay Friday Saw ng Myanmar, 7-12, 7-12, sa quarterfinals.
Sa women’s 5x5 basketball tournament, pasok ang Gilas Pilipinas Women sa quarterfinals mula sa 90-73 demolisyon sa Hong Kong para sa kanilang 2-0 record sa Group B.
Sa women’s football, sasagupain ng Filipinas ang China ngayong alas-3 ng hapon sa Gifu Nagaragawa Stadium.
Sa karate, kinapos sa quarterfinals sina John Christian Lachica (men’s kumite -60kg) at Rebecca Cyril Torres (women’s individual kata).
Sa women’s individual triathlon, bagsak sina Raven Alcoseba at Kim Mangrobang sa 9th at 20th place, ayon sa pagkakasalansan.
- Latest
