Behikulo hulog sa bangin: Driver, 5 pasahero sugatan

MANILA, Philippines — Limang pasahero at isang driver ang himalang nakaligtas sa tiyak na kamatayan makaraang aksidenteng mahulog sa bangin ang sinasakyan nilang behikulo sa kahabaan ng Cervantes-Quirino Provincial Road sa Brgy. Remedios, Cervantes, Ilocos Sur, ayon sa ulat kahapon.

Sa ulat ng Ilocos Sur Provincial Police Office (PPO), nangyari ang insidente sa nasabing lugar may dalawang araw na ang nakalilipas.

Base sa imbestigasyon, habang bumabagtas ang behikulong sinasakyan ng mga biktima sa kahabaan ng Cervanted-Quirino Provincial Road nang mawalan ng kontrol sa manibela ang driver.

Dahil dito, tuluy-tuloy na bumulusok sa bangin ang behikulo na ikinasugat ng mga sakay nito na mabilis na isinugod sa Bessang Pass District Hospital para malapatan ng pangunahing lunas.

Nagresponde ang mga tauhan ng Cervantes Municipal Police Station (MPS), at Cervantes Municipal Disaster Risk Reduction and Management Office (MDRRMO) at sinaklolohan ang mga biktima.