Suganob impresibong miresbak ni Nontshinga

Nakaangkon og katungod nga moaway alang sa IBF light flyweight title

CEBU, Philippines — Si Regie “Filipino Phenom” Suganob milampos sa iyang misyon nga makapanimawos ni Sivenathi “Special One” Nontshinga ug iya kining nakab-ot sa dalaygon nga paagi.

Ang garbo sa Bohol nakarekober human natumba sa ikatulong hugna aron patikangkangon ang South African sa ikalima nga hugna sa ilang International Boxing Federation (IBF) light flyweight title eliminator nga maoy main event sa "Kumong Bol-anon XXVI" sa PMI Bohol Boxing Promotions niadtong Sabado sa gabii, Septiyembre 12, sa Bohol Wisdom School (BWS) Gymnasium sa dakbayan sa Tagbilaran.

Nabuhi human nahagba kadiyot sa ikatulong hugna, si Suganob milandig og sunod-sunod nga mga suntok ngadto sa ulo nga nakapasukarap sa kanhi two-world champion sa hingpit sa oras nga 2:54 sa ikalimang hugna.

"Nindot kaayo ang ako feeling. Happy kaayo ko nga na-achieve nako nga ma-knockout siya," matud pa ni Suganob human siya nakaresbak sa boksidor nga mipatilaw sa una ug bugtong pa niyang pildi sa iyang karera.

Si Suganob napukan pinaagi sa unanimous decision batok ni Nontshinga nga mao pa ang kampiyon sa una nilang sangka tulo ka tuig na ang milabay didto sa South Africa.

Ning higayona, ang 29-anyos nga si Suganob nakabawi atubangan sa mga paisano niyang Bol-anon.

Gawas nga miinat sa iyang rekord ngadto sa 19-1 nga gidayan-dayanan na karon og 8KOs, si Suganob nakaangkon sab og katungod nga mohagit sa trono sa IBF light flyweight division, nga sa kasamtangan gikuptan ni Thanongsak Simsri (40-1, 35KOs) sa Thailand.

Si Simsri gikatakda nga modepensa iyang titulo batok sa kababayan ni Suganob nga si

Mark Vicelles karong Septiyembre 26 sa Japan.

"Good luck ninyong duha (Simsri ug Vicelles," dason pa ni Suganob. "Kinsa ang modaog ninyo andam ko mo-challenge."

Si PMI Boxing CEO Atty. Floriezyl Echavez Podot nagkanayon nga andam silang mo-host sa world championship sa Bohol kon mahatagan og oportunidad.

"We're very happy and proud to show to the IBF that we are capable of holding big events," paambit pa ni Podot.

"We're more than ready and willing to bring the IBF title fight here in Bohol if given the chance," padayon pa ni Podot.

Sa supporting bouts sa makasaysayanong promosyon, tulo ka mga rehiyonal nga kampiyon sa IBF ang milugwa gikan sa PMI Stable.

Si Leonard "The Dreamer" Pores III (12-0, 8KOs) sa Claveria, Misamis Oriental mipukan sa bisitang Indon nga si Andika Fredrikson “D' Golden Boy” Ha'e (21-4-2, 11KOs) pinaagi sa 5th round TKO aron birahon ang korona sa IBF Pan Pacific flyweight division.

Si one-time world title challenger Reymart “Cebuano Assassin” Tagacanao (14-1, 11KOs) sa Napo, dakbayan sa Carcar City nakaipsot ni Chunlin Kuang (5-2, 2KOs) sa China aron langkaton ang IBF Asia super flyweight belt.

Ang duha ka mga judges parehong mi-iskor of 97-93 alang ni Tagacanao samtang ang laing judge mitali og 96-94 hinungdan sa nabahin nga desisyon.

Sa pasiunang engkwentro, si Datu "The Conqueror" Adam (8-0, 6KOs) sa isla sa Camiguin mipakamang ni Oky Akbar (12-5, 5KOs) sa Indonesia sa oras nga 2:03 sa ikapitong hugna aron sakmiton ang IBF Asia junior featherweight title.