NXLED sasandig sa eksperyensa vs EST Cola
MANILA, Philippines — Inaasahang gagamitin ng Nxled ang kanilang eksperyensa sa pagsagupa sa guest team EST Cola ng Thailand sa 2026 Premier Volleyball League (PVL) Invitational Conference Finals.
Magkikita ang Chameleons at mga Thai spikers ngayong alas-6:30 ng gabi para sa kanilang ‘winner-take-all’ championship game sa Smart Araneta Coliseum.
Ito ang parehong unang PVL Finals appearance ng Nxled at EST Cola na tumapos sa fourth place noong 2024 edition na pinagreynahan ng Creamline.
“Siyempre, iyong Thailand kasi mga bata pa iyan eh, so ganado pang maglaro, hindi pa napapagod talaga,” sabi ng 32-anyos na si Myla Pablo ng Chameleons sa guest squad.
Nasa isang two-game winning run ang Nxled, habang apat na sunod na panalo ang hinataw ng EST Cola matapos matalo sa dating reynang PLDT sa una nilang laban sa torneo.
Inungusan ng Thai team ang Chameleons via five-setter sa una nilang pagtatagpo sa eliminasyon.
“Siguro I think ang kailangan namin gawin this Tuesday is ibigay iyong best namin,” wika ni Pablo na muling makakatulong sina Fil-Am middle blocker MJ Phillips, Jonah Sabete-Escamillan, Jaqui Acuna, EJ Carino at setter Gel Cayuna.
Sasandigan ng EST Cola sina Papatchaya Phontham, Nannaphat Moonjakham at Nirarach Srikuta.
Ang 20-anyos na si Phontham ang second-leading scorer ng torneo matapos pumalo ng 97 points tampok ang 84 attacks.
Sa ikalawang laro, paglalabanan ng High Speed Hitters at Cool Smashers ang bronze medal sa alas-4 ng hapon.
Sa unang laban sa ala-1:30 ng hapon maghaharap ang Farm Fresh at guest team Ho Chi Minh City ng Vietnam para sa fifth place.
- Latest
