Kyla, milusad  sa “Next Episode” ug “Bring Your Jacket”

CEBU, Philippines — Usa na usab ka milestone sa music career ni Kyla ang pag-release sa vinyl edition sa iyang album nga “Next Episode,” nga giubanan sa bag-ong visualizer sa iyang single nga “Bring Your Jacket.”

Gipabuhagay  ni Kyla ang iyang kalipay ug pasalamat sa pagkahimo sa physical copy sa “Next Episode,” nga gi-release  sa Backspacer Records.

Gibutyag usab sa singer nga iyang gihikay ang deluxe version sa “Next Episode,” nga naglangkob  og mga bag-ong kanta.

Madungog ang  mga unod sa album sa nagkalain-laing digital streaming platforms, samtang ang vinyl edition makuha pinaagi  sa Backspacer Records. Ang visualizer sa “Bring Your Jacket” kay makita  usab sa ABS-CBN Star Music YouTube channel.

Bag-ong hugna sa career

Naghinam-hinam na si Lovi Poe sa bag-ong hugna sa iyang career isip Star Magic artist.Suma pa sa aktres  nga daghang kausaban ang iyang giagian karon, dili lamang sa iyang personal nga kinabuhi kondili apil usab sa iyang career.Tungod niini, excited usab si Lovi sa mga bag-ong oportunidad nga iyang masinati isip Star Magic artist, lakip na ang posibilidad nga makatrabaho ang ubang mga artista sa maong talent management.

Nagplanong mobiya

Ganahan na gyud diay unta mobiya sa showbiz si JC Alcantara niadtong 2025.  Plano unta niya nga motrabaho sa laing nasud . Apan nausab ang dagan sa iyang plano human nakadawat og mga proyekto sa iWant . Usa sa nakakita sa iyang potensyal mao si Direk Ivan Andrew Payawal.

Balanse sa oras

Dili sayon alang sa kanhi  “Pinoy Big Brother” housemate nga  Zach Guerrero ang pagbahin sa iyang oras tali sa pag-eskwela sa Dentistry ug iyang showbiz career.Bag-o lang  nahimong kabahin si Zach sa  iWant original series nga “Miss Behave”. Nagpadayon karon ang aktor sa iyang clinical requirements isip dentistry student,  samtang nagdawat  usab og acting projects.Alang  kaniya, importante ang hustong pagplano ug pagdumala sa oras.

Adbokasiya ni Katrina Johnson , naabot sa Santa Fe ug Bantayan

Gidala ni Binibining Pilipinas International 2026 Katrina Johnson ang iyang adbokasiya  alang sa katawhan  didto  sa Santa Fe ug Bantayan, Cebu, isip pagpangandam sa iyang pagrepresentar sa Pilipinas sa Miss International 2026 nga ipahigayon didto sa Japan karong Nobyembre.

Gibisita  ni Katrina  ang  mga estudyante ubos sa Special Needs Education (SNED) program sa Santa Fe ug sa Deaf Community sa Bantayan National High School, diin personal siya nga  niturn-over og learning materials ug uban pang resources aron makatabang sa ilang edukasyon.

Pinaagi sa maong inisyatiba, padayon nga gipasiugda ni Katrina  ang importansya sa paghimo og luwas ug inclusive nga mga lugar alang sa kabataan , diin ang matag usa adunay higayon nga makaapil, makakat-on ug madungog.

Gibutyag  usab ni Santa Fe Councilor Jaypee Pleños Lao ang iyang suporta sa adbokasiya  ni Katrina  ug naglaom nga mahimong unang lungsod sa Visayas ang Santa Fe nga nakigtambayayong kaniya sa pagpasiugda sa luwas  ug inclusive spaces alang sa deaf  community.

Mitabang usab sa SNED visit ang mga mananaog sa Miss Maricaban 2026.

Gawas sa iyang advocacy work, gibisita usab ni Katrina  ang lokal nga turismo sa Santa Fe pinaagi sa video shoot nga nagpakita sa mga atraksyon sa lungsod, lakip ang Beach Placid .

Nitikang  usab siya sa Aloguinsan ug nakighimamat  sa tourism workers sa Bojo River, diin iyang nasaksihan ang mga paningkamot sa komunidad sa pagpalambo sa lokal nga turismo ug pagmugna og mga oportunidad pinaagi sa sustainable tourism.

Karong Nobyembre, dad-on ni Katrina  ang bandila  sa Pilipinas sa Miss International 2026 sa Japan, diin iyang tinguha nga maangkon  sa nasud ang ikapito nga Miss International crown.

Ang Pilipinas kataposang nakadaog sa Miss International niadtong 2016 pinaagi ni  Kylie Versoza.

Elijah ug Miles, kumpirmadong nagbulag

Gikumpirmar  ni Elijah Canlas nga bulag na sila sa aktres ug TV host nga si Miles Ocampo, human sa pipila ka semana nga mga espekulasyon kabahin sa kahimtang sa ilang relasyon.

Sa vlog ni Ogie Diaz niadtong Martes, , miingon si Elijah nga panahon na aron isulti ang kamatuoran bahin sa ilang panagbulag.

“As much as I’ve been trying to keep it private, siyempre I’m going through it, pero dahil nga lumalabas na siya, I think it’s time for me to say, opo, totoo siya ,” nagkanayon ang  aktor.

Gitataw  usab ni Elijah nga aduna gihapon siyay gugma ug respeto alang kang Miles bisan pa sa ilang panagbulag.

Gikumpirma usab niya nga desisyon nilang duha ang ilang panagbulag ug wala sila’y kasuko sa usa’g usa .

“We broke up mutually and very amicably. Walang hate, at least on my part,” pagklaro  ni Elijah.

Kahinumdoman nga nakasulay na sila nga nagkabulag kaniadto apan nagbalik rapud . Sakit kaayo  alang kang Elijah ang ilang panagbulag karon tungod kay  nagtoo sila nga sila na ang mag-uban hangtod  sa kahangtoran . “We decided, umiiyak lang kami and said thank you to each other for the past five years na mga pinagdaanan namin,” niya pa.