Eala mokumbati na sa US Open

CEBU, Philippines — Moasdang na si Alex Eala sa labing dako nga torneyo sa sumusulbong niyang karera.

Sangkaon sa Pinay tennis star ang Amerikanang si Mary Stoiana sa unang hugna sa US Open 2026 karong adlawa (Miyerkules, Septiyembre 2 oras dinhi sa Pilipinas) didto sa Louis Armstrong Stadium sa Flushing Meadows sa New York.

Ang world No.18 nga si Eala naghinam-hinam nga mosagubang sa tahas nga nag-atang kaniya sa unahan.

“I’ve experienced so much growth since playing in the past here. It’s just excitement all over. I’m very excited to be back,” matud pa ni Eala, nga gipaabot nga makakuha na sab og makabungog nga suporta gikan sa iyang mga kababayan didto sa Big Apple.

Sa miaging US Open, ang 21-anyos nga si Eala No.75 pa sa WTA ratings. Apan mikuha siya og atensiyon human gipayaka si World No. 15 Clara Tauson sa Denmark sa unang hugna.

Misaka pa ang kompiyansa ni Eala human siya nakapildi og pito ka Top 10 players ning tuiga lamang, misakmit sa una niyang WTA title sa Washington Open ug nakaabot sa ikaupat nga hugna sa Wimbledon.

Mao kini ang hinungdan nganong gawas nga misaka siya sa world rankings, si Eala miangkon sab sa labing taas niyang seeding sa usa ka Grand Slam. Sa US Open, seeded No.17 si Eala diin ang una niyang makaharong mao ang world No. 122 nga si Stoiana, kanhi MVP sa US NCAA nga miposte og tulo ka sagunson nga daog sa qualifiers aron pag-abante sa labing una niyang Grand Slam main draw.