SR&T kampiyon sa CABC 8th Corporate Cup

CEBU, Philippines — Ang SR&T Industrial Supply mi-sweep sa Boysen Paints sa ilang best-of-three finals, 83-71, aron langkaton ang korona sa kampiyonato sa Cebu Architects' Basketball Club (CABC) 8th Corporate Cup niadtong Domingo, Agosto 23, sa Game Changer Sports Facility sa dakbayan sa Mandaue.

Si Philip Alegado ang migiya sa SR&T ngadto sa gihandum nilang titulo uban ang 20 puntos, lima ka rebounds, duha ka assists, ug usa ka steal.

Dako sab og naambag si Chester Hinagdanan uban ang 16 puntos, unom ka rebounds, duha ka  steals, ug duha ka blocks, samtang si Jaymel Allanic midugang og 11 puntos alang sa SR&T, nga nahimong ikatulong sunod-sunod nga team gikan sa United Architects of the Philippines (UAP) Sugbu Chapter nga nanghawod ning tinuig torneyo tali sa mga lisensiyadong arkitekto.

Ang Finals Most Valuable Player nga si Dexsel Caadan mihipos og kuwatro puntos, walo ka rebounds, lima ka assists, usa ka steal, ug usa ka block.

Ang SR&T wala na molingi pa sukad sila misirit sa sayong 26-17 nga labaw. Nakasikit ang Boysen ngadto sa kuwatro puntos, 28-32, apan ang SR&T dali nga mibalik sa ilang bentaha ngadto sa 45-36 sa halftime, nga ila pang gipaburot ngadto sa 67-53 human sa tulo kuwarter.

Ang SR&T miestablisar sa kinadak-an nilang labaw nga 20 puntos, 79-59, sa pinal nga singko minutos ug dayon luwas nga milawig ngadto sa tam-is nga kalamaposan.

Si Kim Rebosura nangu sa upat ka Boysen players nga mikadlit og double figures uban ang 16 puntos, upat ka rebounds, tulo ka assists, ug usa ka block.

Si Lemuel Aspacio mitimbre og 15 puntos uban ang pito ka rebounds ug duha ka assists, si Miggy Aparri miposte og double-double nga 13 puntos ug 13 ka rebounds, samtang si Joseph Cabigas mitali og 10 puntos ug pito ka rebounds sa pildirong kawsa.